Colexios de Nigrán e Vigo pásanse a testemuña do Camiño Portugués pola Costa
O Colexio Estudo de Nigrán e o Carrasqueira de Coruxo (Vigo) pasáronse a testemuña onte do segundo tramo do Camiño Portugués pola Costa, tras a primeira etapa iniciada na Guarda. Trátase dunha das accións especiais para conmemorar o 25 aniversario do programa Voz Natura, que dá continuidade á edición anterior dedicada ao Camiño de Santiago e á protección dos seus espazos como protagonistas.
«A xente fai moi mal en lanzar plásticos porque o medio ambiente é necesario, desa forma as persoas mátanse elas mesmas. Recoller residuos é unha experiencia moi boa, todo o mundo tería que facelo polo menos unha vez na vida. Axudamos, divertímonos e aprendemos», comentaba Gabriela Baltar, de terceiro curso da ESO do Colexio Estudo, quen lle pasou a testemuña a Alba Montes, de sexto de primaria do Carrasqueira. «Pareceume precioso atoparnos con outro cole, socializar e axudar ao medio ambiente recollendo lixo», explicaba a alumna do colexio de Coruxo.
Unha vez traspasado a testemuña, os estudantes continuaron ata a Xunqueira do Lagares onde procederon á súa limpeza. Sobre todo, recolleron plásticos e depositáronos no contedor correspondente. En total, participaron 90 nenos de ambos os centros e oito profesores.
«Nós, no Colexio Estudo, temos sorte porque está situado nunha contorna rural con moito arboledo dispoñible. O de hoxe [por onte] foi moi emotivo. Os alumnos do Carrasqueira esperábannos cunha pancarta de benvida e sinalizaron o camiño. Despois dividímonos o terreo e eles foron cara á zona da ponte e nós cara a Samil», explica Javier Gago, coordinador do proxecto do Colexio Estudo xunto a Juan Follea, quen lembra que un curso gañaron o primeiro premio de Voz Natura. «Este ano imos participar cunha universidade de Andalucía para elaborar unha cartografía, unha guía de biodiversidade», engade. Trátase de facer un mapa das especies que quedan en Chandebrito tras os incendios que arrasaron a zona próxima ao colexio no 2017. A cartografía de especies aproveitarase tamén para a sinalización do Camiño ao seu paso pola zona, de forma que permita coñecer a biodiversidade.
Tampouco o colexio de infantil e primaria Carrasqueira é novo no programa Voz Natura como demostrou co seu proxecto A Leira de Carrás, no que segue traballando coas familias. Os alumnos conseguiron crear unha horta na contorna da antiga casa do conserxe, que se atopaba totalmente abandonada. «Este curso xa plantamos e sementamos chícharos, fabas, repolos, tirabequees... Temos unha casa de carafio onde os coidamos e alimentamos para que non ataquen as plantacións», explica a coordinadora Alicia Lence. Na actualidade investigan plantas vulgares que crecen en camiños e campos, como a celidonia, para facer un viveiro e cultivalas.
Voz Natura naceu fai un cuarto de século para concienciar aos máis pequenos sobre a importancia de preservar a natureza e de levar a cabo acciones desde as aulas. Esa misión mantívose ao longo dos anos e segue presente. Boa mostra do interese espertado son os 365 centros adscritos ao programa. Para celebrar este aniversario planea actividades complementarias ao traballo das aulas que se desenvolverán durante o curso. Terán como base os tres piares do programa: comunidade, continuidade e difusión.
Voz Natura é un programa de La Voz de Galicia desenvolto pola Fundación Santiago Rey Fernández-Latorre. Conta co patrocinio da Consellería de Medio Ambiente, Territorio e Vivenda, a Deputación da Coruña, a Fundación Alcoa, El Corte Inglés e a Fundación Ramón Areces.